Ражкоў Л.М., Жарская Т.А., Марцуль У.М., Роўкач А.Ш. Асновы экалогіі і рацыянальнага прыродакарыстання

Вучэбныя дапаможнікі для сярэдніх спецыяльных навучальных устаноў. — Мiнск: Ураджай, 1999. — 327 с.: іл. — ISBN 985-04-0360-8.Дапаможнік напісаны ў адпаведнасці з праграмай аднайменнага курса, выкладзены агульныя універсальныя прынцыпы сучаснага прыродакарыстання. Для навучэнцаў ССНУ.У сучасны момант узаемадзеянне грамадства і прыроды адбываецца ў такіх шырокіх маштабах, што вызначае ў якасці адной з глабальных, агульначалавечых праблем сучаснасці так званую экалагічную праблему. Гэта праблема звязана з пагаршэннем якасці навакольнага прыроднага асяроддзя ў выніку індустрыялізацыі і урбанізацыі, вычарпання традыцыйных (адносна лёгкадаступных) энергетычных і сыравінных рэсурсаў, няспыннага ўзрастання дэмаграфічнай “нагрузкі” на прыроду, парушэння экалагічных балансаў (унутраных механізмаў самарэгуляцыі біясферы), "гаспадарчага" знішчэння асобных відаў жывёл і раслін і г.д. Задача аховы навакольнага прыроднага асяроддзя ад нарастальнай тэхналагічнай экспансіі можа быць вырашана шляхам зрошчвання, спалучэння вытворча-тэхналагічных і прыродных працэсаў на аснове экалагізацыі тэхнікі. Гэта выклікае неабходнасць сур'ёзнай увагі да падрыхтоўкі спецыялістаў, вучэбна-выхаваўчай работы са студэнтамі і навучэнцамі па пытаннях асноў экалогіі, рацыянальнага прыродакарыстання і аховы прыродных багаццяў. Прыродаахоўнае і экалагічнае мысленне павінна стаць неад'емнай часткай ідэалогіі спецыяліста прамысловай вытворчасці і рэалізавацца пры выкананні ўскладзеных на яго прафесіянальных задач.